Asten hontan Sara Carracelas izango da protagonista Korima Filmsek Basque Teaman-entzako ekoitzitako Geldiezinak dokumental-sailean. Sail hau astero dago ikusgai ETB1en, igandetan, 11:30ean, "Helmuga" saioaren barruan.
Sara Carracelasen testigantzaz gain, Geldiezinak saioaren azken atal honetan, Julia PĂ©rez entrenatzailearen eta Elisa Arambarri Aspace Gipuzkoako G1 eta Kimu etxebizitzetako arduradunaren ahotsak ere jasotzen dira.
Sara Carracelas lau Jokotan lehiatu diren euskal emakumeen elite-taldearen barruan dago. 10 domina pilatu zituen Atlanta 1996ko, Sidney 2000ko, Atenas 2004ko eta Pekin 2008ko Jokoetan. Richard Oribek emakumezkoetan duen irudiaren parekoa izango litzateke, baina bere istorioa are ezezagunagoa da; desgaitasuna izateak eta gainera emakumea izateak, bi faktore horiek batera, are gehiago zailtzen dutelako lorpenak ikustarazi eta hedatzea. Berak zabaldutako bideari esker dibertsitate funtzionala duten beste kirolari batzuk, Rakel Mateo, Nahia Zudaire edo Tania Castillo esaterako, lehiatzen dira orain nazioarteko hitzordu nagusietan.
Geldiezinak-Imparables proiektua Eusko Jaurlaritzako Jarduera Fisikoaren eta Kirolaren Zuzendaritzak eta Basque Team Fundazioak abiatutako ekimena da, eta euskal kirolaren historian nabarmendu diren hainbat emakumeren lana eta lorpenak balioesten ditu, belaunaldi berrientzako erreferenteak sortzeko helburuarekin.
Atalez atal, emakumeen kirol-unibertsoaren berezitasunak ulertzen lagunduko duten gai interesgarriak landuko dituzte; amatasuna, estereotipoen haustura, plangintza espezifikoen beharra emakumearen fisiologia kontuan hartuta eta kirol-erakundeetako erabaki-postuetan emakumeen presentzia bultzatzeko beharra, besteak beste.
Dokumentalekin batera podcast sorta bat ere egin da, gai eta protagonista berberekin, eta bakoitzak 20 minutuko iraupena izango du. Horiek EiTB taldeko plataformen bidez entzun ahal izango dira.
Podcast-a entzuteko: https://labur.eus/uBNwz
Dokumentala ikusteko: https://youtu.be/4zxjfp7R9mM