Larunbat hontan, martxoaren 8a, berdintasunaren alde hausnartzeko eta jarduteko funtsezko eguna da. Gure Berdintasun Planean jasota dagoen bezala, aukera hau baliatu nahi dugu ildo horretako ekintzaren bat bultzatzeko, oraingo hontan, feminismoaren esanahian eta hari lotutako oztopo eta sinesmenetan sakontzera bideratuta dagoena.

Emakundek, hiru foru aldundiek eta EUDELek sustatutako aurtengo erakunde arteko kanpainaren leloa "Ni feminista naiz" da, eta Aspace Gipuzkoatik kanpaina horrekin bat egin nahi dugu.

Goiburua "Feminismoa zurekin bat" esaldiarekin osatzen da, eta feminismoak gizarteari egiten dion ekarpena errebindikatzea eta berdintasunaren arloan lortutako aurrerapenei balioa ematea du helburu, baita feminismoaren balioek pertsonen eguneroko bizitzan botere eraldatzailea dutela erakustea ere.

Kanpainak gogorarazten digu feminismoa, berdintasunaren eta justiziaren funtsa ulertzen denean, tresna indartsua dela lan-ingurune dinamikoagoak, bidezkoagoak eta lehiakorragoak eraikitzeko. Ikuspegi hori hartzeak gizarteari ez ezik, gurea bezalako elkarteen arrakasta eta iraunkortasuna ere bultzatzen ditu.